Manatuto, 15 Janeiro 2026 – Sua Exelénsia Ministra Edukasaun Dra. Dulce de Jesus Soares ho Embaixadór Tailandia iha Timor-Leste Sr. Atipat Rojanapaibulya hala’o vizita kortejia ba Eskola Ensinu Báziku Filiál Be’edan Manatuto hodi komprimenta profesór Francisco Carvalho ne’ebé sai manan na’in ba prémiu Maha Chakri husi Tailandia.

Hafoin Vizita Sua Exelénsia Ministra Edukasaun Dra.Dulce de Jesus Soares ba jornalista sira hatete, vizita ida-ne’e espesiál tebes-tebes atu komprimenta profesór Francisco Carvalho ne’ebé sai manan-na’in ba prémiu Maha Chakri iha Tailandia.

“Prémiu ne’e manan tanba profesór sira iha Eskola EBF Be’edan hanorin di’ak tebe-tebes no dala ruma iha teste ba estudante sira husi eskola ida-ne’e sempre hatudu rezultadu di’ak liu-liu iha área literasia no numerasia” tenik SE. Ministra.

Lider másima edukasaun ne’e akresenta, profesór ne’e mós iha esforsu bo’ot ida hodi hanorin estudante sira ho lian materna, tetúm nomós Portugés tanba komunidade maioria ko’alia lian materna.

” Profesór ne’e servisu hamutuk ho inan-aman hodi organiza espazu eskola ida-ne’e ba to’os eskolár no prepara bee liuhusi osan ne’ebé profesór hetan iha prémiu ne’e”, Dehan SE. Ministra.

Membru Governu ne’e husu ba profesór sira hotu atu hala’o kna’ar ho pasiénsia hodi eduka estudante sira la’os deit iha prosesu aprendizajen maibe hanorin mós sira hanesan timoroan atu hadomi ambiente liuhusi programa to’os-eskolár.